موسى عثمان _ يكتب...
#====================#
أبسط كلام
بقلم موسى عثمان
أبسط كلام
ممكن أقوله في حبها
إني إتخلقت
لأني أنا مخلوق لها
.......
وإن النجوم
بتغير عليها من بعضها
وإن العيون
اللي تشوفها تحبها
.....
وإن القمر
لما بيسهر يوم معاها
بيبقى طاير م السعاده
لأنه قاعد جنبها
......
دي الشمس
مره واحده غابت
زعلت وسابت
كل حاجه
وفجأه لمت عفشها
أصل السحابه جات تشاهد .... حسنها
وقفت و حجبت نور حبيتبي ... عنها
قعدت يومين الشمس
تندب حظها
لأنها
واخده شعاعها من نور عنيها وسحرها
فزاد أنينها وحزنها
بس السحابه مكانش طبعا قصدها
كان همها
تشوف عيون
لمعت و سحرها وشدها
سرحت في حمرة خدها
حجبت عن الشمس الدفا
معذوره غصب عنها
والشمس مش عارفه كده
زعلانه مكسوره نفسها
راحت السحابه لشمسها
قالت لها
متزعليش مني بقى
أصل اللقا
من غير ميعاد
بيحلي الدنيا كلها
وأنا من زمان
نفسي أشوفها وأقولها
إن الجمال اللي في عيونها
مشفتهوش على حد في الكون قبلها
بصيت لقيت قلبي إتملا من عطفها
ملكتني رعشه
فقولت أقرب منها
معرفش إنك
كنتي واقفه وقتها
فحجبت عنك
نور عيونها ودفئها
قومتي زعلتي
وأنا إنشغلت بحبها
ضحكت ساعتها الشمس
ضحكه مسمعه
من السحابه
ومن طريقة وصفها
سكتت لحظه راحت عيونها مدمعه
وقالت لها
مش عارفه مين يشعر حالي
ولا عارفه أوصف إيه جرالي
من يوم ما شوفت النجمه دي
وظهرت قبالي
وأنا بستمد الدفئ
من نظرة عنيها وقلبها
ولأني عارفه ان الجمال دا
فارد جناحه
ع الخلايق كلها
لقتني بردو هحبها
ودا كان عتاب
بين السحابه وشمسها
وأنا كنت واقف وقتها
وسمعت تبرير السحابه
والشمس محروق قلبها
.....
حتى الدموع
وهيا نازله من عنيها
بتتكسف من نفسها
و الدمعه
ماسكه في جفونها متبته
ولما يجي الدور عليها
بتتوجع من قلبها
علشان هتهجرها
وتبعد عنها
وإيش حالي أنا
اللي أتخلقت عشان خاطرها
واللي مليش في الدنيا غيرها
واللي في كل ثواني عمري بفتكرها
معقوله هقدر لحظه أنسى حبها
لا مستحيل
أنا ملكها
هيا السما
وأنا أرضها
مقدرش أبعد عنها
علشان أنا
مخلوق لها
بقلم موسى عثمان نهر الشعر
ليست هناك تعليقات:
إرسال تعليق