زغلول الطواب_ يكتب...
☆°°°•••°°°☆°°°•••°°°☆
حوار بين هريدى ووالدته
هريدى :
عندينا فى الصعيد
قلب الراجل حديد
الدم في عروقه حامى
والطبع جواه مولع نار
وارث العند من وِلد الوِلد
عن الأب والجد من زمان
المخ مسوجر ومقفل
تهون عليه نفسه ولا يهمه
في الحق أي حد مهما كان صيته وأسمه
واللغلط عندينا عيب ميعجبشى
الحق حق والحد حد
وكلمة الكبير حدانا ملهاش حدانا رد
بسبب كلمه غلط
أو مين إللى هيسقى الأرض
قبل التانى بقصد أو من غير قصد
الدنيا تنشال وتنحط
ولو واحد حرك بطال
علشان طماع ويجور على حق الجار
وبالمناسبه البطال حدانا
هو الفاصل بين الأرض والأرض
تقوم عركه بالنبوت وضرب النار
أصل حدانا الأرض كيف العرض
ولو عيل هان راجل
تقيد النار وتولع في الدار
تبقى عيطه كبيره
البندقه تطلع قبل النبوت والعصايه
وإللى يضرب بيها طلقه
تطلع كل البنادق إللي في العيله
والرشاشات والمدافع بألف طلقه
والضرب يبقى فى المليان
السما تبقى ضباب وزعابيب وتراب
من دخان ضرب النار العيون عميانه
معارك ومهالك كبيره
بين العلتين متبطلشى
يوقع واحد وإتنين وتلاته
وعشره وميه ومتخلصشى
بسبب كلمه هايفه تخرب فيها الديار
وتقيد بين العيلتين النار
بسبب العند ده يشد وده يشد
وتبقى الدنيا دمار
الكل راكب راسه مش هامه
إللى هيتقتل من ناسه
أصله خايف يا ولداه من العار
عليه العوض فى العيلتين
هيخلصوا على بعض
واحد ورا واحد راجل قبال راجل
عيل قصاد عيل
حتى لو كلب طخه حد
يطخوا قصاده ميت كلب
التار حدانا زى النار
من بصاية نار صغيره
تاكل ما تخلى العمار
الشاعر :
يا ناس كفايه
إرحموا قلوب الصغار
ليه بالعند تخرب الديار
ليه تقفيل الراس
كيف القفل والترباس
لو محتاج يتلين
حطوه في شوية جاز
هريدى :
أسكت متكملشى يا شاعر
وإوعاك تغلط
وإنت متعرفشى كيف المشاعر
معنى الكلام الواعر
خليني أحكيلك
وأنا هادى البال والمشاعر
على كل حال فاكر
لسه منتهاش ضرب النار
والله لو مبقاش
فاضل غير الحريم في الدار
ولا في يوم يقولوا علينا
دى عيله جبانه ومتقدرش تاخد التار
يكشى الدنيا تخرب
وما يبقى فيها عمار
الأرض تبور مش حكايه
البهايم تغور برضه مش حكايه
العيال تتيتم وإيه يعنى
بكره يكبروا يبقوا رجاله
يا ناس الدم في العروق عيغلى
قايد جوايا وعيلسوعنى ليل ونهار مقدرشي
أم هريدى :
متقولش يا ولدى عليه دم
إللى عيجرى في عروقك ده مش دم
ده شيطان فجرى ما يتلم
غير بالتفاهم والصلح بين الناس
وتكتر العيله بخواتك وولاد العم
هريدى :
لا يا مايه دى مية نار عتغلى جوايا
وقايده في جسمى النار
كيف أسيب تارى
وإللى طخوهم دول يبقوا أخويا وأبويا وواد عمى وواد خالى
لو مبقاش يا مايه في العيله غيرى
مش هسيب في يوم حقى
ولازماً يا مايا بيدى آخد التار
ولا يركبنى في يوم العار
مش عيقولوا في الأمثال
العين بالعين والسن بالسن والبادى أظلم
طيب أمال يا مايه أيه الحكايه
مين فينا إللى إبتدى وولع النار
ومين إللى أبتدى الحكايه
عيب والله يا مايه
ولدك يلبس طرحه
وهم يلبسوا القفاطين والشيلان
ويتعايجوا بالعبايه
كيف بعنيا أرقبهم
على الأرض ماشيين
لابسين الجلبيه الصوف
وفوقيها الشال و العبايه
كيف لما يدق الطبل يتعربنوا
ويرقصوا بالعصايه
الناس يقولوا عليا أيه
قاعد وسط الحريم كده ليه
لو كنت أخدت بتارك يا هريدي
كنت لما يدج الطبل
تنزل وتتعربن وتكيد العزال
وتترقص بالعصايه كيف ما بدك
مش كده يا مايا
ولا كلامي سمعاه وعدشيه كيف الرحايه
كيف أعيشوعلى الأرض أمشى
كيف آكل العيش وأملى بطنى
يا مايه ولدك هريدى
مخاصم النوم وعنيه معترمشى
كيف أعيش ويبقالى في الدنيا عيش
ويشاورا عليا الناس ويقولوا
جبان خواف وجليل الربايه
لا يا مايه كده متنفعش الحكايه
والله في سماه
ما تبرد نارى ولا بال يهدالى
غير لما آخد حقى وأغسل بأديا عارى
وآخد من إللى قتل الرجاله تارى
هولعها نار
ماهى كده كده خربانه الحكايه
أم هريدى :
مفيش فايد فيك يا ولدى
بايع نقسك وحارق عليك قلبى
ربنا يهديك
وترجع عن إللى في راسك
عود يا ولدى لرشدك وإرسى
وفكر بعقلك ومتودرش وراك ناسك
راح إللى راح يا ولدي
أبوك وعمك وجدك
وواد عمك وواد خالك وواد خالتك
باقى مين غيرك يا حزين
يا واكل بالعند ناسك
رايح للموت بنبوت
هيقتلوك يا فجرى وهيطخوك
طلقه في صدرك وطلقه في راسك
يا فجري يا واكل ناسك
قبل ما توصل بالنبوت يا ولدى
هتوصلك ألف رصاصه ورصاصه
مقفل راسك ليه
هاين عليك شبابك ولا أيه
هو إنت أشطر من أبوك وعمك
ومن كل إللى راحو قبلك
ليه عايز تطفى بعندك
آخر شمعه في العيله بأيديك
ليه عايز تضلمها عليا وعليك وتسودها وتمرر حنكى عليك
يا ولدى والله حرام عليك
أنت مش هتهدى غير لما تموتنى
بالحسره عليك يا ولدى
كفايه دمار كفايه حرق بالنار
خربت الدنيا وإتخربت الديار
الغيطان بارت والزرع إتحرق
والبهايم من الجوع ماتت
وأديك بعنيك شايف
حتى اللقمه الحاف مخاصمه الشفايف
أرفعلك توبى يا هريدى
وتشوف الحجر
إللى ربطاه على بطنى
ساده بيه الجوع يا ولدي
إنت نفسك بقالك كام يوم مكلتش
جعان ومش لاقي لقمه تسكت بيها عصافير بطنك
حتى نيرخ النخل
كلو الطير إللى في الجو طاير
حتى المايه في الزير نشفت
مفاضلشى غير الغربان
عتحوم حوالينا ف كل مكان
والبوم عيقوق حوالينا
والخراب فوقينا والفجر تحتينا
إستهدى بالله يا ولدى
وإخزى الشيطان
وإنسى التار وضرب النار
إللى بتاكل ولا تخلى
خدنا أيه من وراها
غير الحزن والمرار
وموت الرجاله وخراب الديار
إرحمنى يا ولدى
يا حزنى عليك بدرى
يا مرارى يا حزنى
يا حرقة عليك قلبى
وإنت في عز شبابك
هتروح مني بدرى
هريدى :
إرحمينى إنتى يا أمايه
و بطلى تعديد ليل ونهار كفايه
عايزانى أقعد جنبك كيف الولايه
هاتيلى طرحه
ولبسهانى من عندك
وغيرى إسمى وإحلقيلى شنبى
وسمينى شلبايه
لو ده يرضيكى يا أمايه
هاتى توب من إتوابك
وغطى راسى
وخديني جارك وبالبرده خبينى
من عيون الناس يا مايه
وإللى يسألك عليا
قوليلهم مات من شويه
ولو قالولك
مين إللى قاعده جارك
قوليلهم بتى شلبايه
يمكن يجينى عريس يكون راجل
مالهوش أم تخاف عليه
وشنبه فوق حنكه شايل
يوقف الصقر عليه ولا يتهزش
والبندقه فوق كتفه
متقله قلبه معيفطش
عارفه ليه يا أمايه علشان أمه
كانت عايزاه يكون راجل
لا يتعاير ولا يدارى وشه
ولا فيه نديد يكيده ويهزه
عارف ليه يا مايه علشان راجل
خايفه عليا من الموت
مخلاص وقع النبوت
ومات فيا الراجل
دا لو طخوا كلب
برصاصه طلعت كدب
النار تقيد في القلب
وعياخده قصاده ميت كلب وكلب
إشحال إللى راحوا كانوا رجاله
والله في سماه
لو هموت من غير ما أقول آه
ولو كنت عضمه ف قوفه
وماسك ف إيدى قشايه
لاخد بتارى
من إللى قادوا فى قلبى النار
ولو مبقاش في البيت قشايه
أنى قولتها كلمه
ومش عايز أسمع بعديها ولا كلمه
كفايه يا أمايه أسكتي خلصت الحكايه
الشاعر : عمر التار ما كان له نهايه
ودى بداية الحكايه
ف كل بلد تار وناس بتتعاير
خراب ودمار ونار بتاكل الرجاله
المخ مقفل والعند مسيطر
والحكايه ما ليها نهايه
أمتى نغير عوايدنا
ونسامح بعض ونتصالح
أو نسيب الحكومه والقانون
يحكموا بالعدل بينا
ونعيش في أمان وسلام
وعيالنا تكبر وتبقى رجاله
حرام ولا حلال يا هريدي
ياللي نفسك تولع الدنيا
وتتعايق بالجلبيه الصوف والعبايه
يا راجل بص بعنيك
وشوف الدنيا الكدابه
مهما فيها تعيش
هتسيبها لغيرك وما تاخد منها هبابه
غير عملك الزين وضميرك وعمل الخير
الشاعر
زغلول الطواب
